Sahil Babayevin "çarıqlı milyoneri": Fəhlənin adına şirkət açıb və... - İLGİNC FAKTLAR

OXUNUB: 461 Özəl GÜNDƏM SOSİAL
Vaxtilə bu texnologiyadan keçmiş Əmlak Komitəsinin sədri Kərəm Həsənov istifadə etmişdi. Bakıda iki böyük zavodun səhmləri Lerikdən olan bir fəhlənin adına rəsmiləşdirilmişdi. Məlum olmuşdu ki, Gəray Məmmədov adlı "çarıqlı milyoner", bu lerikli fəhlə paytaxtın "Şanxay" adlı ərazisində gecəqonduda yaşayır, özü isə iki zavodun 80 faiz səhminə sahib olmasından bixəbərdir. Demə, Kərəmov bu əli qabar olmuş fəhlənin adına sənədləşdirməklə ona heç qara qəpik də verməyib. İndisə məlum olur ki, eyni yolu əmək və əhalinin sosial müdafiəsi naziri Sahil Babayev təkrarlayır. Vəzifəyə gəldiyi tarixdən ən çox şikayət və narazılıq olan nazir Babayev K. Həsənov kimi fəhlənin adına şirkət təsis edib. Həmin fəhlə isə nazirin kabinetində təmir işləri görüb. Anaxeber.info bu barədə məlumat verir ki, həmin fəhlənin Elvin Ramazanov olduğu üzə çıxıb. Fəhlənin haqqını kəsən, əlilin pensiyasını kəsən, qazini intihara çatdıran, kütləvi narazılıq yaradan S. Babayevin bir fəhlənin adından istifadə edərək Vətən müharibəsi zamanı şirkət yaradıb Çindən mallar sifariş verib. Hadisə belə vaqeə olub: müharibənin ən qızğın vaxtında, ard-arda şəhid xəbərləri gələndə, camaat övladının boğazından 20-30 manat kəsib cəbhəyə yardım göndərəndə, Türkiyə diplomatik, siyasi, hərbi istiqamətlərdə tam olaraq Azərbaycanın yanında olanda, nazir Sahil Babayev daha çox pul qazanmaq üçün qardaş ölkənin şirkətlərindən imtina edərək, nədənsə Çindən sifarişlər verirmiş. Belə ki, Əmək və Əhalinin Sosial Müdafiəsi Nazirliyi Özünüməşğulluq proqramı çərçivəsində 2019-da Türkiyədən "Ayzak Mizrak” sifariş edirmiş. Biri zavodda 2600 dollara olsa da, "Aznest" QSC bunu nazirliyə 4735 dollara satırmış. Fərq: 2135 dollardır. 2020-ci ilin oktyabrında, müharibənin qızğın vaxtında "Aznest" QSC həmin avadanlığa oxşar, amma imkanları daha az olan, uyğunluq sertifikatı olmayan avadanlığı Çindən 1200 dollara alıb, nazirliyə isə 4517 dollara satılıb. Fərq: 3317 dollar... Bu proqram çərçivəsində 2019-cu ildə 11 milyonluq türk malının 9 milyon manata qədəri Çinə transfer edilib. 2018-ci ildə Sahil Babayev nazir təyin olunandan bu proqram çərçivəsində bağlanan 7 müqavilənin hamısı, 4-ü isə tendersiz məhz bu QSC ilə bağlanıb. İctimai fəal Bəxtiyar Hacıyev belə yazıb. Aydın olur ki, Sahil Babayev nazir təyin olunandan 2 ay sonra təsis olunan bu QSC-nın təsisçisi KİV-də Elvin Ramazanov olaraq yayılıb. Tanıyanlar onun Sahil Babayevin kabinetini təmir edən fəhlə olduğunu bildirirlər. Nazirliyə tabe olan Dövlət Məşğulluq Agentliyi 2019-da "Aznest” QSC və "Agri KON” QSC-yə 16 milyon manatlıq bir dəfə, 34 milyon manatlıq da bir dəfə satınalma edib. Nə "təsadüf”! Hər iki QSC eyni gündə yaradılıblarmış!28.06.2018 – nazir təyin olunandan 2 ay sonra. Qiymət təxminən eyni gəlirsə, uyğunluq sertifikatı varsa, nazirin kabinetində fəhlə işləyən adama məxsus olduğu deyilən şirkətə on milyonlarla manatlıq tenderlər verilirsə, malları niyə Türkiyədən yox, Çindən aldıqlarını nazirlik açıqlaya bilərmi? Bundan əlavə, fəhlənin şirkəti necə ola bilib? Bəlkə şirkət elə nazirə aiddir, Babayev onun adına yaradıb?! Görünür, Sahil Babayev "özünüməşğulluq” sözündəki "özünü” hissəsini yanlış anlayıb. Camaata 190 manatı düzgün bölüşdürə bilən sistem qura bilməyib, amma tenderlərdə yaxşı sistem qurulub. Yəqin onun kadrı "190 manatları bitirək, öz işimizə qayıdaq” deyəndə öz işləri kimi bunları nəzərdə tuturmuş. Amma təkcə 190 manat məsələsi deyil, nazir 190 min adamın pensiyasını kəsib. Bu, onların dolanışıq yeri idi, həmin vətəndaşların şirkətləri, QSC-ləri yoxdur. Parlamentdə Tahir Kərimli nazirin ünvanına ən yaxşı tənqidləri yağdırdı. Deputat dedi ki, səni ora təyin ediblər islahat aparasan, deməyiblər 190 min yetim-yesirin pensiyasını kəsib həm narazı salasan, həm gəlir mənbəyindən məhrum edəsən. Amma deyəsən, S.Babayev əhalinin sosial vəziyyətini heç dərk eləmir - bu bahalıqda, çətin zamanda insanları 200 manatdan da məhrum edir. Çünki ağzı isti yerdədir, şirkətləri Çindən mal vurur, ona görə xalqın güzəranı yadına düşmür, toxun acdan xəbəri olmazmış... Ümumiyyətlə, həmin QSC və fəhlə Ramazanov faktoru araşdırma predmetidir. Bu işdə korrupsiya şübhələri olub-olmaması da yoxlanılmalıdır. Özünü islahatçı nazir hesab edən Babayev belə işlərə girişibsə, onun reformist olması onda bizim kosmonavt olmağımız kimi bir işdir. Gələn məlumatlar da belə deməyə əsas verir ki, nazirdən total narazılıq olması, hətta parlamentdə bunun dilə gətirilməsi yuxarıların diqqətini çəkib. Ya Babayev fəaliyyətinə düzəliş etməli olacaq, ya da onunla haqq-hesab çəkiləcəyi istisna deyil. Bizsə sözügedən QSC və varlı fəhlə mövzusunda jurnalist tədqiqatını davam etdiririk. /Anaxeber.info

RƏYLƏR