Xəbər verdiyimiz kimi, iyulun 3-də Gəncədəki "Ağ çiçəyim” gül mağazasına hücum olub.

İCMAL.az-a daxil olan məlumata görəŞəhərin Şeyx Bahəddin küçəsində yerləşən gül mağazasına bir neçə nəfər daxil olaraq orada olan gülləri dağıdıb və işçilər - 44 yaşlı İsgəndər Seyidov və onun qardaşı 43 yaşlı Anar Seyidovu döyüblər. Yaralılar xəstəxanaya aparılıb. Faktla bağlı hüquq mühafizə orqanları tərəfindən araşdırma aparılır.

İCMAL.az-ın redaksiyasına daxil olan videoadan da aydın olur ki, 10 nəfər vəhşicəsinə satıcının üstünə düşür və onu ölümcül döyürlər. Sonraisə heç nə olmamış kimi salonu tərk edirlər.

Hadisənin təfərrüatları məlum olub. Məlumata görə, satıcını döyən şəxs Gəncə şəhərində yerləşən keçmiş Dinamo cəmiyyətinin sədri Namiq Əliyevin qardaşı oğlu Bəşir adlı şəxs olub. O başına 10-a yaxın gənci yığaraq mağazaya basqın edib və küt alətlə satıcını döyüb. Nəticədə satıcı olan qardaşlardan birinin qabırğası sınıb, beyni silkələnib. Xəstə reanimasiya şöbəsinə yerləşdirilib.

Hadisənin hansı səbəbdən baş tutduğu da məlum olub. Sakinlərin iddiasına görə, Bəşir adlı şəxs həmin ərazinin özünə məxsus olduğunu və orada istədiyi hər şeyi edə biləcəyini deyib. Məlumata görə, Bəşir 24 saat çalışan mağazaya gecə vaxtı gələrək, işçilərlə zarafatlaşır və onları mütəmadi olaraq təhqir edib. Məsələni bilən mağazanın müdiri bu haqda Bəşirlə söhbət edib və bu hərəkətin doğru olmadığını deyib. Satıcıların ondan şikayət etməsi Bəşirin xoşuna gəlməyib və ertəsi gün 10 dostu ilə mağazaya basqın edib və ondan şikayət edən satıcını döyüb.

Sakinlərin dediyinə görə, Bəşir adlı şəxs və əmisi Namiq Əliyev həmin ərazidə "Ağ çiçəyim" dükanının açılmasına ilk gündən razı olmayıblar.

Qeyd edək ki, məsələ ilə bağlı hələ ki, saxlanılan və ya həbs olunanlarla bağlı rəsmi açıqlama yoxdur./azxeber.com

Mağazaya basqının videosunu təqdim edirik: