Xəbər verdiyimiz kimi "Azərsun” Holdingin prezidenti Abdulbari Gözəlin kürəkəninin qardaşı sahibkarlara 28 min manat, işçilərə isə 11 min manat pul verməli olduğu halda yoxa çıxıb.

7News.Az xəbər verir ki, "Azərsun” holdingin prezidenti Abdulbari Gözəlin kürəkəni, "Azərsun” Holdingə məxsus "İkra Lojistika” şirkətinin direktoru Akın Konyarın qardaşı, "Azərsun” Lojistik mərkəzin ərazisində olan restoran və bağırsaq sexinin sahibi Fərdi Konyar müxtəlif vaxtlarda onun bağırsaq sexinə bağırsaq təhvil verirmiş sahibkarların ödənişlərini etsə də sonradan vədinə xilaf çıxıb və ödənişləri gecikdirib. Bu minvalla 8 nəfər sahibkara ümumilikdə 28.480 manat borclu qalıb. Eyni zamanda onun sexində çalışan 20 işçinin maaşları da 11.548 manat vəsait Fərdi Konyar tərəfindən ödənilməyib. 40 min manata qədər pul borclu olduğunu təsdiq edən möhürlü sənəd verdikdən sonra isə Fərdi Konyar qaçaraq türkiyəyə gedib və bir daha geri qayıtmayıb. Sahibkarlar isə "Azərsun” Holdinqdən pullarını istəsələr də şirkətin hüquqşünası kimi özünü təqdim edən şəxs bildirib ki, şirkət bu məsələyə görə heç bir məsuliyyət daşımır.

Sahibkarlar bu məsələ ilə bağlı Bizimyol.info-ya bildiriblər ki, hazırda rəsmi qaydada Baş Prokuror Zakir Qaralova, yeni təyin olunan Daxili İşlər naziri Vilayət Eyvazova və Türkiyənin Azərbaycandakı səlahiyyətli səfiri Erkan Özorala müraciət edilib.

Həmçinin sahibkarlar əlavə edirlər ki, xeyli vaxtdır müraciət etsələr də Daxili İşlər Nazirliyindən başqa məktuba digər iki şəxs reaksiya verməyib.