Dünyanın ən təhlükəli xəstəliklərinin vaxtında aşkarlanması artıq Azərbaycan üçün problem olmayacaq.

İcmal.Az xəbər verir ki, bunu "xəzərxəbər.az”-a müsahibəsində Baş nazirin müavini Abid Şərifov deyib. 

Paytaxt Bakıda "quş qripi”, "donuz qripi”, "taun çöpü”, "ebola” və digər bu kimi epidemiyaya çevrilməyə meylli olan xəstəliklərin vaxtında aşkarlanması üçün Bakıda referens laboratoriya tikilir. 

Nizami rayonunda yerləşən və ərsəyə gəlməsi üçün 90 milyon dollar xərclənən laboratoriyaya ABŞ 70 milyon dollara yaxın qrant ayırıb. İngiltərə kimi inkişaf etmiş ölkə də daxil olmaqla, belə mərkəzlərin sayı dünyada 4-dən çox deyil. Strateji əhəmiyyətə malik laboratoriya ilin sonunda istifadəyə veriləcək.

Baş nazirin müavini A.Şərifov paytaxtdakı beton binaların sökülməsinə də aydınlıq gətirib. O bildirib ki, 1-ci mikrorayonda 9 bina tikiləcək. Daha sonra isə digər mikrorayonlardakı evlər bir-bir söküləcək.

İnvestorlar tərəfindən qəzalı evlərin yenidən tikilməsi praktikası burada da tətbiq olunur. Söküləcək evlərin sakinləri kirayə haqqı ilə təmin olunacaq və yeni binalar tikildikdən sonra onlara orada mənzil veriləcək.

Baş nazirin müavini Abid Şərifov "Sovetski”də aparılan işlərdən də danışıb. O bildirib ki, yenidənqurma işləri plana uyğun şəkildə sürətlə davam edir.

Mövzu ilə bağlı daha ətraflı videomaterialı təqdim edirik: