Bakıda qoçuluq edən daha bir sürücünün görüntüləri sosial şəbəkələrdə yayılıb.
Görüntüləri qeydə alan sürücü yanvarın 2-də, təxminən saat 17:56 radələrində
A.Salamzadə küçəsində öz zolağıyla hərəkət edən zaman 90-CC-788 qeydiyyat
nişanlı "Lexus" markalı avtomobilin sürücüsü onun qarşısına keçərək qəfil tormoz
verib. Bunu görən sürücü təhlükədən yayınmaq üçün zolağını dəyişən zaman
qarşıdakı sürücü yenidən onun hərəkətini məhdudlaşdırıb. Beləliklə, o, qarşısındakı
sürücünün təhlükəli olduğunu görüb uzaqlaşmaq istəsə də, 90-CC-778 qeydiyyat
nişanlı avtomobilin sürücüsü onun qarşısını kəsərək təhlükəli hərəkətlər edib. Bu
hərəkətlər birbaşa İnzibati Xətalar Məcəlləsinin 511-ci maddəsinin tələblərinin
pozulması ilə nəticələnir.
Videogörüntüdən aydın şəkildə görünür ki, "Lexus" markalı avtomobilin sürücüsü
ictimai qaydanı və əhalinin dincliyini nümayişkaranə şəkildə pozan, cəmiyyətə açıqca
hörmətsizlik ifadə edən, yol hərəkəti qaydalarının müxtəlif üsullarla davamlı olaraq
pozulması ilə müşayiət olunan qərəzli hərəkətlər edir. Belə ki, o gah zolağını dəyişmək
istəyən sürücünün qarşısına keçib yol vermir, gah qəfil tormozlama edir, gah da sağdan
ötmə edir. Ümumiyyətlə, 3 dəqiqəlik video boyu təhlükəli manevrlərin sayı-hesabı bilinmir.
Sürücünün bütün hərəkətlərini analiz edəndə görünür ki, burada ardıcıl olaraq qayda
pozuntuları var. Bu qayda pozuntuları qəsdən edilir və cəmiyyətə açıq-aşkar hörmətsizlik
nümayiş olunur. İnzibati Xətalar Məcəlləsinin 511.1 maddəsində isə belə yazılıb:
511.1. Avtoxuliqanlıq, yəni nəqliyyat vasitəsinin sürücüsü tərəfindən ictimai qaydanı və
əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən,
yol hərəkəti qaydalarının müxtəlif üsullarla davamlı olaraq pozulması ilə müşayiət olunan
qərəzli hərəkətlərə görə -
nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan
yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ
bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə
alınmaqla, on beş gündən bir ayadək müddətə inzibati həbs tətbiq olunur.
Ümid edirik, DYP rəsmiləri digər hərəkət iştirakçılarına təhlükə yaradan bu sürücü barəsində
vaxtında müvafiq tədbir görər.
Görüntüləri təqdim edirik./Avtosfer.az
İcmal.Az
