İyulun 4-də Zaqatala rayonunun Yuxarı Tala kənd sakini İlqar Davudov iyunun 26-da evindən külli miqdarda pul və qızıl-zinət əşyalarının oğurlanması barədə Rayon Polis Şöbəsinə ərizə ilə müraciət edib. O, polisə gec müraciət etməsinin səbəbini yaxın çevrəsindən şübhələnməsi və axtarışlarının bir nəticə verməməsi ilə izah edib.

DİN-dən İcmal.Az-a verilən məlumata görə, bununla əlaqədar polis rəisi Adil Ələkbərovun rəhbərliyi ilə istintaq-əməliyyat qrupu yaradılıb. Hadisə yeri ətraflı müayinə edilib, oradan oğurluğu törədənlərə məxsus maddi sübutlar aşkar edilərək götürülüb. 

"İsti izlər"lə həyata keçirilən əməliyyat-axtarış tədbirləri nəticəsində şəhər sakini Süleyman Davudov şübhəli şəxs qismində saxlanılaraq RPŞ-yə gətirilib. Ətrafında aparılan tədbirlərlə onun oğurluğu Natiq və Şahin adlı həmyerliləri ilə birlikdə törətməsi müəyyən edilib. Görülmüş tədbirlər nəticəsində Natiq İsmayılov və Şahin Harunov da saxlanılaraq RPŞ-yə gətiriliblər.

Aparılan araşdırmalar zamanı oğurluğun törədilməsində Süleymanın həm də bələdçilik etməsi, Şahinin isə sürücü kimi fəaliyyəti müəyyən edilib. 

İstintaq-əməliyyat tədbirləri ilə onların zərərçəkmişin evinə pəncərədən girərək, oradan içərisində 1200 ABŞ dolları və 8000 manat dəyərində qızıl-zinət əşyalarının olduğu çantanı götürdükdən sonra istirahət guşələrindən birinə getmələri, orada əldə etdikləri qəniməti öz aralarında bölmələri, çantanı isə şəhərin kənarından keçən Vilvan çayının kənarına atmaları müəyyən edilib.

Çanta da maddi sübut kimi polis əməkdaşları tərəfindən həmin yerdən tapılaraq götürülüb və istintaqa təqdim olunub.

Faktla bağlı cinayət işi başlanılıb, istintaq-əməliyyat tədbirləri davam etdirilir.

İcmal.Az