Dövlətçilik tariximizin şanlı qürur səhifəsi

Müstəqil Azərbaycan Respublikası bu günkü gücü, qüdrəti yoxdan var olmayıbdır. Əlbəttə ki, ölkəmizin inkişafı üçün canlarından keçən, həyatını məhz xalqının, Vətəninin inkişafına həsr edən böyük şəxsiyyətlər olmuşdur. Azərbaycan xalqı hər zaman bu şəxsiyyətləri dərin hörmət və ehtiramla anmışdır. Heydər Əliyev öz həyatını, fəaliyyətini Vətəninə həsr edən, Vətəninin, torpağının mənafeyini hər zaman üstün tutan dahil lider olaraq xalqımızın yaddaşında dərin iz qoymuş və ümummilli lider adını əbədi olaraq qazanmışdır.

Ümummilli lider Heydər Əliyevin hər zaman kəlamlarında da Vətəninə , qurucusu olduğu Aəzrbaycanına bağlılığını ifadə etmişdir: "Azərbaycanlı kimi dünyaya gəldiyimə, Azərbaycan dilində danışdığıma, Azərbaycan kimi Vətənim olduğuna, Azərbaycanı təmsil etdiyimə görə özümü həmişə xoşbəxt saymışam”.
Bu gün Heydər Əliyev - əsl azərbaycanlı, tarixi şəxsiyyət haqqında yazı yazmaq mənə bir gənc kimi çox böyük şərəf və qürur hissi gətirir.
1993-cü ilin 15 iyun tarixi xalqımızın yaddaşına əsl Qurtuluş tarixi kimi yazılıb. Bu tarixi yaradan isə ulu öndər Heydər Əliyevdir. "Müasir müstəqil Azərbaycan Ümummilli Liderin şah əsəridir” tezisi də məhz həmin dövrün reallıqları əsasında formalaşaraq bugünkü günümüzdə atılan addımların əsasında dayanır. Dahi şəxsiyyət Heydər Əliyevin hakimiyyətinin hər iki dövrü dövlətə, xalqa xidmət nümunəsidir. Əgər hakimiyyətinin birinci dövründə Azərbaycanı keçmiş İttifaqın ən geridə qalmış ölkəsindən ən qabaqcıl respublikasına çevirmişdisə, 1993-cü ildə xalqın təkidli tələbi ilə hakimiyyətə qayıdışı ilə xilaskarlıq missiyasını yerinə yetirərək ölkəmizi, müstəqilliyini itirmək, dünyanın siyasi xəritəsindən silinmək təhlükəsindən xilas etdi. Ulu Öndər Heydər Əliyevin hakimiyyətə qayıdışı ilə inkişafın sarsılmaz təməlləri qoyuldu. Bu gün elə bir sahə yoxdur ki, biz onun haqqında danışanda Ulu Öndər Heydər Əliyevi ehtiramla və hörmətlə anmayaq. Çünki müasir müstəqilliyimizin bütün sahələrinin inkişafı, tərəqqisi məhz onun adı ilə bağlıdır. Elmdən səhiyyəyə, iqtisadi inkişafdan ordu quruçuluğuna qədər hər bir profildə Ulu Öndərin fəaliyyəti ölkəmizin mövcudluğunu təmin etmişdir. Lakin bir məqamı unutmamaq lazımdır ki, bütün inkişaf tendensiyaları üçün məhz stabil siyasi mühit lazımdır. Yəni inkişafı təmin edən əsas məqam mühitin formalaşmasıdır. Ulu Öndər Heydər Əliyev Milli Qurtuluşumuzu gerçəkləşdirməklə gələcək inkişafımız üçün münbit və stabil şərait yaratmış oldu.
Dahi şəxsiyyət haqqında söz deməyin və onun dediklərini şərh etməyin asan olmadığı bəlli bir həqiqətdir. Dahi şəxsiyyət haqqında nitq söyləmək, yazı yazmaq çox böyük məsuliyyət və cəsarət tələb edir. Deyilən söz yüz dəfələrlə ölçülüb-biçilməlidir. Bununla belə, danışmaq istəyən şəxsin ideyaları şəxsiyyətin dühasından qidalandıqda bütün bu çətinliklər aradan qalxır, fikirlərin dumanlığı qarşısında işıqlı bir yol açılır.
"Ən böyük şəxslər özündən çox mənsub olduğu cəmiyyəti düşünən, onun varlı-ğının və xoşbəxtliyinin yolunda həyatını verən insanlardır”. Heydər Əliyevin diliylə deyilən bu sözləri, məhz mən bu gün dahi şəxsiyyətin özünə aid etmək istərdim.
Milli iftixarımız, xalqımızın böyük oğlu Heydər Əliyev siyasət nəhənglərindən biri kimi müasir dünya tarixində əbədiyaşarlıq haqqı qazanmışdır. Azərbaycanlılar üçün o, müstəqil Azərbaycan dövlətinin qurucusu, xalqın ən böyük təəssübkeşi və öndəridir.
İndiki yaşlı, orta və gənc nəsil Heydər Əliyevi uzun illər dövlətin əvəzsiz rəhbəri və öndəri kimi tanımışdır. Qüdrətli, şəxsiyyətilə seçilən, qeyri-adi siyasi istedada malik Heydər Əliyevi xalqına bağlayan tellər olduqca möhkəm idi. Ona dərin hörmət bəsləyən, xidmətlərinə dəyər verən hər bir azərbaycanlı onu öz ailəsində, həyatında görür və hiss edir.
Bu gün Azərbaycan xalqının ən böyük arzusu reallaşıb. İndi dünyanın siyasi xəritəsində müstəqil Azərbaycan Respublikası adlı bir dövlətin də adı var. Demokratik inkişaf yolunu müəyyənləşdirmiş bu dövlətin dünənində və bu günündə dünyanın ən böyük siyasətçilərindən biri olan Heydər Əliyevin möhürü vardır.
Ümummilli lider Heydər Əliyev bütün Azərbaycan xalqının əbədiyaşar öndəridir, dövlətimizin qurucusu və memarıdır. Doğrudan da, müstəqil Azərbaycan Respublikası Heydər Əliyevin şah əsəridir. Onun davamçısı, ideyalarının reallaşması uğrunda ardıcıl siyasət yürüdən, bu şah əsəri Ulu Öndərin arzuladığı zirvəyə çatdırmaq üçün çalışan Prezidentimiz İlham Əliyev bu salnamənin – yeni tariximizin ən parlaq səhifələrini xalqımıza güvənərək xalqdan güc alaraq yaşadacaqdır.
Bəli, bu gün İlham Heydər oğlu Əliyev xalqımız qarşısında üzərinə götürdüyü şərəfli, şərəfli olduğu qədər də ağır vəzifənin öhdəsindən bacarıqla gəlir, atasının müəyyən etdiyi və özünün son dərəcə praqmatik düşüncə, idarəetmə məharəti, liderlik istedadı ilə sahib durduğu siyasi kursu bacarıqla davam etdirir.