Məktəb direktoru tanınmış müəllimi buna görə POLİSƏ ŞİKAYƏT ETDİ - AÇIQLAMA

OXUNUB: 762 SOSİAL
Sosial fəaliyyəti ilə məşhurlaşan Lənkəran rayonu Gəgiran kənd tam orta məktəbin müəllimi Həbib Əlizadə həmin məktəbin direktoru Ziyafəddin Cavadov tərəfindən polisə şikayət edilib.

Bu barədə tanınmış müəllim H. ƏLizadə özü şəxsi hesabından məlumat yayıb.

"Bir neçə saat bundan öncə Lənkəran şəhər Polis Şöbəsindən mənə zəng edildi və haqqımda məktəb direktoru tərəfindən təqdimat verilərək şikayət edildiyi bildirildi. Mən şok oldum. Səbəbini soruşdum. Dedilər ki, uşaqları icazəsiz Bakıya ekskursiyaya aparırsan”.

H.Əlizadə əslində məsələnin tam fərqli olduğunu və ona iftira atıldığını söyləyib:

"Şagirdlərə Bakı şəhərinə gəzinti-ekskursiya təşkil edilməsi ilə bağlı məlumat vermişdik. Gəzinti çərçivəsində Şəhidlər Xiyabanı, bir çox tarixi abidələr, dövlət idarələri və digər yerlərə aparılmaq istənilirdi. Əgər yerli təhsil idarəsi icazə verib tədbirlər planını təsdiq etsəydi, gəzinti olacaqdı. Əks halda gəzinti olmayacaqdı. Bu sadəcə hələ bir ideya idi. Lakin direktor polisə şikayət edib ki, mən icazəsiz şəkildə gəzinti təşkil etmək istəyirəm. Tamamilə iftiradır. Çünki gəzinti hələ təşkil olunmayıb və bu sadəcə ideya idi. Təsəvvür edirsinizmi ki, tarixi gəzinti ideyasına belə mane olurlar. Özləri isə əsla tarixi ekskursiya təşkil etməyiblər”.

O, məktəbdə direktor tərəfindən arzuolunmaz şəxs elan edildiyini də sözlərinə əlavə edib:

"Məktəbdə baş verən bir çox problemlər və çatışmazlıqlar haqda çox vaxt yazmazdım. Mümkün qədər həllinə çalışardıq. Direktordan şəxsim üçün deyil, məktəblə bağlı müəyyən istəklərim olub və beləliklə arzuolunmaz müəllim elan olunmuşam. Fikrimcə, artıq məktəbdə işləməyimi istəmirlər. Halbuki direktorun özünə belə işlərinə görə şəxsən kömək etmişəm. İndi isə direktor mənə iftira atır, məni ləkələyir. İndiyədək heç bir zaman polis orqanlarında şikayət edilən kimi iştirakım olmayıb, heç piyada kimi də qayda pozuntusu mənə yazılmayıb. Sabah isə 11:30-da Lənkəran polis şöbəsində olacam”.

Qeyd edək ki, Qafqazinfo.Az saytı məsələ ilə bağlı Ziyafəddin Cavadovun da mövqeyini öyrənməyə çalışıb lakin direktor ona ünvanlanan suallarını cavablandırmaqdan imtina edib:

"Mən bu barədə heç nə danışmaq istəmirəm. Hüquq-mühafizə orqanlarına müraciət etmişəm, onlar araşdıracaqlar”.


 

İcmal.Az

RƏYLƏR