Məşhur “Evrostroy-S.S” MMC tikinti şirkətini məhkəməyə verdilər - 6,2 milyon manat borcu var

OXUNUB: 414 GÜNDƏM HADİSƏ
İqtisadiyyat Nazirliyi Yanında Dövlət Vergi Xidməti Bakı şəhəri Lokal Gəlirlər Baş İdarəsinin ölkənin aparıcı tikinti şirkətlərindən olan "Evrostroy-S.S” MMC-yə qarşı qaldırdığı məhkəmə iddiasına bu gün Bakı Apellyasiya Məhkəməsində baxılacaq.

Məhkəmə iclası hakim Raqib Qurbanovun sədrliyilə keçiriləcək.
Dövlət Vergi Xidmətinin "Evrostroy-S.S” MMC-yə qarşı hansı səbəbdən məhkəmə iddiası qaldırıldığı açıqlanmayıb. Lakin, ehtimal etmək olar ki, məhkəmə iddiası şirkətin vergi borcu ilə bağlıdır.

Dövlət Vergi Xidmətinin açıqladığı məlumata görə "Evrostroy-S.S” MMC-nin hazırda dövlət büdcəsinə 6 milyon 189 min 708 manat 52 qəpik vergi borcu var.

Məlumat üçün bildirək ki, bugünə kimi mətbuatda "Evrostroy-S.S” MMC ilə bağlı çoxsaylı qalmaqallı xəbərlər yayılıb. "Evrostroy-S.S” MMC-nin adı Prezident Administrasiyasına barəsində ən çox şikayət edilən tikinti şirkətlərinin arasında da yer alıb.

Qeyd edək ki, əvvəlki adı "Evrostoy – S.S” MMC olan indi ki, "Sipark İnşaat” tikinti şirkəti Bakının bir neçə küçəsində pilot layihə adı altında binaların inşasını acı bağırsaq kimi uzadır. Şirkət kirayələrə köçürdüyü sakinlərə verdiyi vədi tutmur və onların yeni evlərlə təmin edilməsi yubanır.

Sakinlərin şikayətləri bir neçə dəfə mediada ictimailəşsə də, əvvəlki adı "Evrostoy – S” MMC olan "Sipark İnşaat” onları müxtəlif bəhanələrlə yola verməkdədir.

Ümumiyyətlə, "Sipark İnşaat”ın Bakının başqa ərazilərindəki tikinti layihələri ya yarımçıq dayanıb, ya çox ləng gedir, ya da şirkət heç bir yeni proyekt reallaşdırmır.

Belə çıxır ki, ya ciddi böhran içindədirlər, ya rəhbərlik səviyyəsində bilinməyən gizli məsələlər dövran edir, ya da vətəndaşlar açıq şəkildə aldadılırlar. Onların müraciətlərinə də hər dəfə belə izah verilir ki, iş gedir, tezliklə hazır olacaq. Fəqət, neçə ildir bir binanın ortaya çıxara bilmirlər.

Təsadüfi deyil ki, bu yaxınlarda AMEA ilə "Evrostroy-S” MMC arasında bağlanmış podrat müqaviləsinə və inşaat pasportuna əsasən görülən bir layihənin fırıldağı üzə çıxmışdı.

AMEA-nın keçmiş rəhbərliyi – Akif Əlizadə, mənzil bölgü komissiyasının sədri İbrahim Quliyev, AMEA-nın işlər idarəsinin müdiri, Mənzil bölgü komissiyasının sədr müavini Fətəli Abdullayev, AMEA-nın işlər idarəsinin müdir müavini, Mənzil bölgü komissiyasının katibi Sərdar Əliyev və komissiyanın digər üzvləri, "Evrostroy – S MMC” şirkətinin rəhbəri Seymur İsayev ilə gizli şəkildə sövdələşərək mənzilləri AMEA-ya dəxli olmayanlara satıblar.

"Evrostroy-S” MMC izi itirmək üçün şirkətin adını "Sipark inşaat” adlandırılıb. Bu şirkətin adı bir çox qalmaqallı hadisələrdə tez-tez hallanır.

Ümumiyyətlə, son illər "Sipark” tikinti şirkətinin və onun rəhbəri Seymur İsayevin adı müxtəlif qalmaqallarda çəkilir.

Xatıradaq ki, şirkətin rəhbəri Seymur İsayev o şəxsir ki şəriki Rafael Qarayevi özündən uzaqlaşdırmaq üçün onu o vaxtkı Milli Təhlükəsizlik Nazirliyinə apardıb. General Akif Çovdarovla əlaqələrə malik olmuş Seymur İsayev şərikindən ayrılmağa bəhanə gəzirmiş.

MTN generalına etdiyi xahişlə R.Qarayevi esktremist vəhhabi ittihamı ilə nazirliyə çağırıb sorğu-sual edib, dindirib, təzyiq göstəriblər. Bu barədə mətbuatda yazılıb./Yeniavaz.com

RƏYLƏR