“Multikultural Azərbaycan” (multikultural.az) saytı yaradılır

OXUNUB: 41 MARAQLI
"Kamillik” Vətəndaşların Hüquqi Maarifləndirilməsi İctimai Birliyi Azərbaycan Respublikası Mədəniyyət Nazirliyinin maliyyə yardımı ilə həyata keçirdiyi "İnformasiya texnologiyalarından səmərəli istifadə etməklə mədəni müxtəlifliyin təbliği və "Multikultural Azərbaycan” internet səhifəsinin (multikultural.az) yaradılması” layihəsinin icrasına başlayıb. İB-dən Azadinform-a verilən məlumata görə, layihə çərçivəsində Azərbaycan, rus və ingilis dillərində "Multikultural Azərbaycan” (multikultural.az) internet resursu yaradılacaq.

"Multikultural Azərbaycan” (multikultural.az) internet resursu mədəni müxtəlifliyin təbliği ilə bağlı aşağıdakı istiqamətlərdə fəaliyyət göstərəcək: 

- Mədəni müxtəlifliyin təbliği istiqamətində yerli və beynəlxalq statuslu tədbirlər barədə davamlı informasiyalar yayacaq: 

- Ümumdünya Mədəniyyətlərarası Forum, Bakı Beynəlxalq Humanitar Forum və "Bakı  prosesi” çərçivəsində həyata keçirilən tədbirlər təhlil olunacaq; 

- Müxtəlif mədəni qrupların dilləri, mədəniyyətləri, məişətlərinin qorunmasında dövlətin gördüyü işləri ictimailəşdirəcək. 

- Multikultural.az internet resursunda Azərbaycanın çoxmillətli ailəsində birgə həyat və fəaliyyətin inkişaf etdirilməsinə çalışılacaq;

- Layihə müddətində və ondan sonrakı dövrdə milli azlıqların mədəniyyətləri hərtərəfli təbliğ olunacaq.

Eyni zamanda müasir informasiya texnologiyaları (internet saytlar) vasitəsilə Azərbaycanda birgəyaşayış naminə həyata keçirilən mədəni siyasət təbliğ olunacaq.  Bu zaman sabit birgəyaşayış üçün digər xalqların mədəni dəyərlərinə hörmət aşılanacaq. Müstəqillikdən sonra dövlətin bu sahədə gördüyü işlər araşdırılacaq, Mədəniyyət Nazirliyinin mədəni müxtəlifliyin təbliğindəki rolu ictimailəşdiriləcək.

Layihə çərçivəsində həmçinin milli azlıqların informasiya texnologiyalarından istifadə imkanları öyrəniləcək. Azərbaycan mətbuatında multikultural ənənələr araşdırılacaq və saytda yerləşdiriləcək. Həmçinin müstəqillik illərində milli azlıqların yaratdığı yazılı və elektron media resurslarının statistikası aparılacaq, mədəni müxtəlifliyin təbliğindəki rolları öyrəniləcək. 

Həmçinin azsaylı xalqları təmsil edən mədəniyyət mərkəzləri və cəmiyyətlərin monitorinqi aparılacaq.  Müstəqillik illərində həmin mədəni qruplara sözügedən sahədə göstərilən dövlət dəstəyi araşdırılacaq, monitorinqin nəticələri multikultural.az saytı vasitəsi ilə ictimaiyyətə çatdırılacaq. 

Qeyd edək ki, sentyabrın sonunda "Multikultural Azərbaycan” (multikultural.az) internet resursunun təqdimatı keçiriləcək.  Mərasimdə milli azlıqların nümayəndələri, bu sahə ilə məşğul olan vətəndaş cəmiyyəti institutlarının əməkdaşları, jurnalistlər iştirak edəcək.
 
 
7News.Az

RƏYLƏR