Paşinyan Qarabağı ikinci dəfə işğal etmək istəyir

OXUNUB: 73 SİYASƏT
Dağlıq Qarabağ Ermənistanın tərkib və ayrılmaz hissəsidir.

Ermənilərin son 150 il ərzində yürütdükləri siyasəti alt-üst edən, İrəvanın son 26 ildəki diplomatik fəaliyyətini və bəyanatlarını tamamən yerə vuran bəyanatı Ermənistanın baş naziri Nikol Paşinyanı Xankəndidə, 7-ci Ümumerməni Yay Oyunlarının açılışındakı mitinqdə deyib.

Onun sözlərinə görə, sən demə, ermənilər arasında son illərdə müəyyən parçalanma və bölünmə vardı. İndi isə həmin fraqmentarlıqdan, yəni bölünmədən imtina zamanı çatıb.

"Xalq inqilabı deyəndə ümumerməni inqilabını anlamaq gərəkdir. Bu isə o deməkdir ki, inqilab, sadəcə, Ermənistanda yox, dünyadakı bütün ermənilər arasında baş verib. Deməli, inqilabın dəyərləri ümumierməni dəyərləridir. Həmin dəyərlərin yenidən qiymətləndirilməsi Ermənistanı dünyanın demokratik xalqları və dövlətləri ilə bir cərgədə tutacaq. İnqilab Ermənistanda, burada və bütün ermənilər arasında davam etməlidir. Uzun illər boyu aramızda parçalanma, bölünmə olub. Bu parçalanma aradan qaldırılmalıdır. "Qarabağlı", "gümrülü", "icevanlı" və s. anlayışlardan imtina etmək gərəkdir", - Paşinyan deyib.
 
 

O daha sonra vurğulayıb ki, ümumerməni ideyalarının gücləndirilmə yollarından biri də Ermənistanın Dağlıq Qarabağın inkişafı ilə güclənməsidir. Bunun üçünsə N.Paşinyan erməni diasporunun imkanlarından və potensialından yararlanmağı zəruri hesab edir.

Eyni zamanda, xaricdəki ermənilərin Ermənistana və Dağlıq Qarabağa köçü, repatriasiya da İrəvandakı hakimiyyətin qarşısında duran prioritet məsələlərdən biri olmalıdır.

"Ermənistan hökumətinin hazırladığı meqalayihələrdən birinin işçi variantını diqqətinizə çatdırıram. 2050-ci ilədək Ermənistan əhalisinin sayını 5 milyona çatdırmağı, 1,5 milyon iş yeri yaratmağı, 2,5 milyon vətəndaşımızın məşğulluq problemini həll etməyi və yoxsulluğu tamammilə aradan qaldırmağı düşünürük. Ermənistanın ÜDM-ni 15 dəfə artırmaq, hər birinin kapitalının 10 milyard dollar olacağı ən azı 5 İT şirkəti yaratmağı düşünürük. Bundan başqa, Ermənistanın silahlı qüvvələri dünyanın ən güclü 20 ordusu arasında yer almalı, dövlətimiz dünyanın ən effektiv 10 xüsusi xidmət strukturlarından birinə malik olmalıdır. Çoxlarınız soruşa bilərsiniz ki, bu planda niyə qarabağlı ermənilər yoxdur. Cavab çox sadədir: Dağlıq Qarabağ elə Ermənistandır. Bu qədər bəsit", - Paşinyan deyib.

Sonda o vurğulayıb ki, bəhs etdiklərinə çatmaq üçün yol xəritəsi hazırlamaq gərəkdir.

Nikol Paşinyanın söylədiklərini "tərcümə" etsək, açması çox sadədir.

2020-ci ilin baharında Dağlıq Qarabağda "prezident və parlament seçkiləri" adlı fars olacaq. Dünyanın heç bir ölkəsinin, hətta Ermənistanın belə tanımadığı məkandakı absurd seçkilərin İrəvan üçün önəmsizlik qədər önəmi var.

Çünki Dağlıq Qarabağdakı xuntanın indiki lideri Bako Saakyan Ermənistanın sabiq prezidentləri Robert Köçəryanın və Serj Sarqsyanın protejesi, həmin adamların birbaşa nəzarətində olan və bu duetə xüsusi sədaqəti ilə seçilən adamdır.

Robert Köçəryan 2008-ci ilin 1 mart hadisələri ilə bağlı vəzifə səlahiyyətlərindən sui-istifadədə, habelə korrupsiyada suçlanaraq həbs olunanda onun zaminə buraxılmasına nail olanlardan biri də Bako Saakyan və Dağlıq Qarabağdakı xuntanın sabiq lideri Arkadi Qukasyan idi.

Onlar Ermənistanda "karabaxtsi" adlanan, əslən Dağlıq Qarabağdan olan ermənilərin formalaşdırdıqları klanın liderləridir. Həmin klan isə Ermənistanın bütün sahələrində ciddi təsir imkanlarına, habelə maliyyə resurslarına və ən başlıcası, Rusiyanın dəstəyinə malikdir.

Hakimiyyətə gəldiyi, daha doğrusu, gətirildiyi ilk gündən etibarən "karabaxtsi"lərə qarşı səlib yürüşünə çıxan, R.Köçəryanı həbsə atdıran, Serj Sarqsyanınsa həbsini hazırlayan Nikol Paşinyan qarabağlı ermənilərin ona ən ciddi rəqib olduqlarını bilir. Bildiyi üçün də Dağlıq Qarabağdakı xuntanın rəhbərliyini kontrola almaq, indi olduğu kimi ona sərt siyasi və hərbi müxalifətdə duran ciddi qüvvə ilə birlikdə yaşamaq istəmir.

Dağlıq Qarabağın Ermənistan olduğu barədə marazmı səsləndirən N.Paşinyan daha sonra "inqilabın ümumerməni məsələsi" olduğunu vurğulamaqla qarabağlı ermənilərin də "yanlış" seçim edəcəkləri təqdirdə Xankəndidə geniş etiraz aksiyalarına rəvac verəcəyini hələlik üstüörtülü şəkildə anons edib.

Yəni Paşinyan rəqibləri, daha doğrusu, düşmənləri Robert Köçəryan, Bako Saakyan və Arkadi Qukasyana xəbərdarlıqlar ünvanlayaraq Dağlıq Qarabağın və Azərbaycanın erməni işğalında olan digər ərazilərinin onların "areal"ı olmadığını vurğulayıb.

5 milyonluq əhali, dünyanın 20 ən güclü ordusundan biri, ən güclü kəşfiyyat və əks-kəşfiyyat sistemi barədə deyilənlər isə, yumşaq desək, aşkar idiotizmdir.

Əhalinin sayı durmadan azalan, demoqrafik fəlakət yaşayan Ermənistanın silahlı qüvvələrinin deyilən səviyyəyə çatması üçün İrəvanın illik hərbi-müdafiə xərcləri minimum 15-20 milyard dollar olmalıdır. Bu, minimal rəqəmdir və əslində illik xərclər 40-50 milyard dollar təşkil etməlidir.

Yoxsul, səfil, sərhədlərini Rusiya qoruyan, Moskvadan tam asılı olan, ABŞ ilə əxlaqsız qadın vücudunu ticarətə çıxardığı təki alver edən Ermənistan bəhs olunan "məqsəd"lərə çatmaq üçün ya Çin və ya Yaponiyanın valyuta ehtiyatlarını ələ keçirməli, ya da Marsda koloniya salmalıdır.

Bundan başqa, N.Paşinyan ABŞ-ın ssenarisi və maliyyəsi ilə reallaşdırılaraq "inqilab" adlandırılan faktiki çevrilişin "ümumerməni məsələsi" olduğunu vurğulayaraq yerini möhkəmlətmək, diaspora ilə münasibətləri normallaşdırmaq istəyir.

Ermənistanın baş naziri "inqilab" kimi qələmə verdiyi çevrilişdən sonrakı proseslərin idarə olunma mexanizmlərini indi də Xankəndidəki xuntaya qarşı tətbiq edərək Köçəryan-Sarqsyan duetinin tərəfdarlarını siyasi iflic durumuna salmaq niyyətindədir.

Fəqət, qarabağlı ermənilər idiotik vədlər verən və yalan danışdığı aşkar görünən Nikol Paşinyana inanacaqlarmı?

Xankəndidəki "Dirçəliş" meydanında qarabağlı, ermənistanlı ermənilərlə yanaşı, xarici ölkələrdən gəlmiş haylara xitab edən Paşinyanın əsas məqsədi Dağlıq Qarabağdakı "seçkilər"də öz namizədlərinin qələbəsini təmin etməkdir.

Təbii ki, Paşinyanın "Qarabağ" tezisləri maraqldıdır. Çünki Dağlıq Qarabağ münaqişəsinin nizamlanmasına yönəlmiş dinc danışıqlar prosesində pauza müşahidə olunurdu. İndisə proses başa çatıb və N.Paşinyan yeni təşəbbüslərlə çıxış etməlidir. Ən azı bir addım atmalıdır.

Nikol Paşinyanın Xankəndidəki çıxışında iki məqam diqqət çəkir: "Dağlıq Qarabağ Ermənistanın tərkib hissəsidir" və "inqilab Ermənistanla yanaşı, Dağlıq Qarabağda və bütün ermənilər arasında davam etdirilməlidir"

İlk ifadə ziddiyyətlidir. Çünki Paşinyanın sözlərinin sarsaqlama təsiri bağışlamaması üçün Ermənistan parlamenti Dağlıq Qarabağı ölkəyə birləşməsi barədə müvafiq akt qəbul etməlidir.

Yerevan bunu edən deyil, qarabağlı ermənilər də "müstəqillik" xəyalından əl çəkən deyillər. Belədə çıxış yolunu tapmağa çalışan N.Paşinyan hazırda erməni işğalında olan rayonlardan 7-ni azad etmək, əvəzində isə rəsmi Bakı tərəfindən Dağlıq Qarabağın "müstəqilliyi"nin tanınmasını təklif edə bilər.

Fəqət, N.Paşinyan unudur ki, Dağlıq Qarabağ və işğal olunmuş digər ərazilərimiz heç zaman Ermənistan torpaqları olmayıb. Ona görə də Paşinyanın xəyalları Azərbaycan ərazisinin anneksiyasını, ilhaqını nəzərdə tutur.

Təbii ki, Azərbaycan belə absurd planla heç vaxt razılaşmayacaq, işğalçının təklifini rədd edəcək.

İkinci məqama gəldikdə isə, Paşinyan "inqilab" vasitəsilə Dağlıq Qarabağ erməniləri üzərində nəzarətə yiyələnmək fikrindədir.

Bu da alınan deyil.

O, sadəcə, vəziyyəti daha da gərginləşdirir.

İcmal.Az

RƏYLƏR