Cənab Prezident İlham Əliyev 2025-ci il noyabr ayının 3-də Azərbaycan Milli Elmlər Akademiyasındakı çıxışında milli inkişafımızı müəyyən edəcək strateji konsepsiyanı təqdim edib və burada başlıca istiqamətlərdən birinin elm və sənayenin birgə fəaliyyətinin olmasını vurğulayıb. Bununla da ölkə iqtisadiyyatının və elmimizin gələcək dayanıqlı inkişafı üçün məhz universitet–sənaye əlaqələrinin effektivliyi əsas prioritet kimi irəli sürülüb.
Sənaye və universitet əməkdaşlığının əsas göstəricilərindən biri birgə fəaliyyət nəticəsində əldə edilən praktik əhəmiyyətə malik elmi-tədqiqat işləridir.
Belə ki, qarşılıqlı elmi əməkdaşlıq çərçivəsində "Azəralüminium” MMC, Azərbaycan Texniki Universiteti (AzTU) və Mingəçevir Dövlət Universitetinin (MDU) alimlərinin birgə fəaliyyətinin nəticəsi olaraq "Study of the Complex Processing Technology of Alunite Using Sulfurous Acid: A Pilot Approach” adlı elmi məqalə Kanadaya məxsus, Scopus indeksli "Mathematical Modelling of Engineering Problems” jurnalında dərc edilib.
Elmi-tədqiqat işi "Azəralüminium” MMC-yə məxsus Gəncə Alüminium İstehsalat Kompleksində həyata keçirilib. Kompleksdə texnoloji pilot layihə çərçivəsində aparılan proseslər zamanı avadanlıqların alınması, laborator mühitin yaradılması və sınaqların təşkili uğurla təmin olunub.
Məqalənin həmmüəllifləri "Azəralüminium” MMC-dən professor Cəmil Səfərov, AzTU-dan professor Sübhan Namazov, professor Fəxrəddin Yusubov, dosent Əli İbrahimov və MDU-nun gənc alimi Ramil Həsənovdur. MDU-nun gənc aliminin bu layihədə fəal iştirakı universitetin elmi potensialının sənaye ilə əməkdaşlıq müstəvisində praktik nəticələrə çevrilməsinin növbəti nümunəsidir.
Bu elmi-tədqiqat prosesi Azərbaycanda müasir alüminium sənayesinin yeni inkişaf mərhələsini hədəfləyir. Əsas məqsəd alüminium sənayesinin sıfırdan milli resurslar əsasında formalaşdırılmasını elmi-texnoloji müstəvidə təmin etməkdir. Sözügedən məqalə bir il ərzində bu istiqamət üzrə əldə olunan ikinci elmi nəticədir və yeni istehsal müəssisəsinin qurulmasına dair ilkin texnoloji pilot layihənin eksperimental nəticələrini özündə birləşdirir.
Qeyd edək ki, 2025-ci ilin 8 iyul tarixində MDU ilə "Azəralüminium” MMC arasında imzalanmış Memoranduma əsasən birgə elmi tədqiqatların aparılması, ustad dərslərinin təşkili, tələbələrin istehsalat təcrübəsinə cəlb edilməsi və digər əməkdaşlıq istiqamətləri müəyyən olunub. Hazırkı elmi nəticə həmin əməkdaşlığın real, ölçülə bilən və milli sənayenin inkişafına xidmət edən bariz təzahürüdür.
