Son günlərdə Bakı şəhərində taksi fəaliyyətinə qoyulan limit xəbəri bazarda ciddi rezonans doğurub. Nazirlər Kabinetinin qərarına əsasən, Bakı şəhərində taksi minik avtomobilləri ilə sərnişin daşımaları üçün verilən icazələrin sayı 25 minlə məhdudlaşdırılıb.
Hazırda isə təxminən 34 min taksi avtomobili fəaliyyət göstərir ki, bu da 9 minə yaxın artıqdır. Bu yeni limitlə bağlı Azərbaycan Yerüstü Nəqliyyat Agentliyinin açıqlaması göstərir ki, mövcud icazələr ləğv edilməyəcək, ancaq növbəti icazələrin verilməsi vaxtı limitlərə uyğunlaşma təmin olunacaq. Bu, o deməkdir ki, bazarda tədricən nizamlanma prosesi başlayır.
Yeni qaydalar taksi sektorunda fəaliyyət göstərən sahibkalara təsirsiz ötüşməyəcək. İlk növbədə təklifin azalması taksi qiymətlərinin artması ilə müşaiyət oluna bilər. Bazarda taksi sayı məhdudlaşdıqca, təklif azalacaq. Təklif azaldıqca, təbii ki, tələb sabit və ya artan səviyyədə olduğu halda qiymətlərdə artım müşahidə oluna bilər. Bu, taksi sahibləri üçün gəlirin artımı deməkdir. Lakin sahibkarlar qiymət məsələsini bazarın qəbul etdiyi həddə saxlamalı, müştəri itkisindən qaçmalıdırlar. Bu yenilik eyni zamanda keyfiyyət və xidmətin yüksəlməsi imkanı deməkdir. Limitləşmə bazara yeni, keyfiyyətli və peşəkar xidmət təklif edən oyunçuların daxil olmasına şərait yarada bilər. Qabaqcıl texnologiyalar, müasir avtomobillər və sürücü hazırlığı bu mərhələdə üstünlük təmin edəcək. Bu halda sahibkarlar icazə və lisenziyalara yanaşmanı yenidən nəzərdən keçirməlidir. Əgər artıq icazəniz varsa, bu aktivinizə yatırım kimi baxın. Onu qoruyun, vaxtında yeniləyin və qanunvericiliyə uyğun idarə edin. Qiymətləri balanslaşdırmaq üçün müştəri xidmətini yüksəltmək vacibdir. Müştəri loyallığını qorumaq gələcəkdə daha da vacib olacaq. Rəqəmsal platformalar, mobil tətbiqlər və sürücü izləmə sistemləri ilə işinizi optimallaşdırın. Bu, əməliyyat xərclərini azaldır və rəqabətdə üstünlük yaradır. Həmçinin bazardakı dəyişiklikləri yaxından izləyin, rəqiblərin fəaliyyətini analiz edin və yeni siyasətlərə uyğun çevik strategiyalar qurun. Limitləşmə yeni icazələrin verilməsində növbəlilik prinsipinə əsaslanır. Potensial yeni biznes sahibləri üçün bu, planlaşdırma və hazırlıq üçün vaxt deməkdir.
Ümumilikdə, Nazirlər Kabinetinin qərarı taksi bazarında nizam-intizamı və xidmət keyfiyyətini artırmaq məqsədi daşıyır. Sahibkarlar üçün bu, həm çağırış, həm də fürsət kimi qiymətləndirilməlidir. Bazarda rəqabətin azalması qiymətlərə təsir edə bilər, lakin müştəri məmnuniyyəti və innovasiyalara yatırım uzunmüddətli uğurun açarıdır. Bu yeni şəraitdə çevik, adaptiv və müştəri yönümlü biznes modelləri uğur qazanacaq. Limitləşmədən doğan imkanları görmək və qabaqcıl addımlar atmaq isə hər sahibkarın prioriteti olmalıdır.
