Müasir təbabətdə həkimlərin əlində çoxlu müalicə vasitələrinin olmasına baxmayaraq, ən ağır vəziyyətlərdə xəstələrin həyatlarının xilas edilməsi üçün əvəzsiz rol oynayan canlı dərman donor qanıdır. Müxtəlif travma və yaralanmalar, mürəkkəb cərrahi əməliyyatlar və doğuşlar zamanı qan itirmələrində, xroniki qan azlığında, qanın irsi və qazanılmış xəstəliklərində, onkoloji xəstəliklərdə, daxili orqanların (ürək, böyrək, mədə-bağırsaq, qaraciyər və s.) müxtəlif xəstəliklərində qandan və ya qandan hazırlanmış preparatlardan geniş istifadə olunur. Qandan belə geniş istifadə edilməsi ona olan tələbatı da artırır. Çox təəssüf ki, pandemiyanın başladığı dövrlərdə həyata keçirdiyimiz qanvermə aksiyalarının göstəriciləri aşağı düşdü. Sözsüz ki, buna səbəb insanlarda qanvermə zamanı ola biləcək yoluxma qorxusu idi. Lakin bu uzun sürmədi qısa zaman ərzində aparılan maarifləndirmə işləri öz bəhrəsini verdi. Etiraf etməliyik ki, Mərkəzi Qan Bankının əməkdaşlarıda operativ prosesləri nəzarətinə aldı. Pandemiyanın tüğyan etdiyi dövrlərdə də, hazırda da qanvermə zamanı yoluxma təhlükəsi yoxdur və lazım olan bütün təhlükəsizlik qaydalarına əməl olunur. Sevindirici məqamlardan biridə odur ki, ümumiyyətlə, pandemiyanın başlamasından dərhal sonra Azərbaycanda görülən tədbirlər öz səmərəliliyini göstərir. Bundan irəli gəlir ki, Azərbaycan bu xəstəlikdən itkilərin az olduğu ölkələr siyahısındadır. Real vəziyyət göstərir ki, ölkəmizdə yoluxma sayı sürətlə artarsa, bunun öhdəsindən gəlmək üçün ölkədə bütün imkanlar mövcuddur. Hazırda xəstəxanalarda kifayət qədər çarpayı ehtiyatı var, reanimasiyalar ağır xəstələr üçün hər cür tibbi avadanlıqlarla təmin olunub; Ölkə əhalisini könüllü və təmənnasız qanverməyə dəvət edirik. Qan xəstələrinin tələbatlarını qarşılamaq üçün qan ehtiyatlarının yetərli qədər olması vacibdir. Gələcək nəslin sağlamlığı üçün bu addım vacibdir.
