Liviyanın Benqazi şəhərində məscid yaxınlığında ardıcıl iki partlayış törədilib.

Terrorçuların içi partlayıcı ilə dolu iki avtomobili havaya uçurması nəticəsində azı 33 nəfər həlak olub.

Yaralı sayının 30-a yaxın olduğu xəbər verilir.  

İlk avtomobilə yerləşdirilmiş partlayıcı qurğu əl-Süleymani rayonunda yerləşən məscidin qarşısında, sakinlər axşam namazından çıxan zaman işə salınıb. İkinci avtomobil isə hadisə yerində təşviş düşdükdən 10-15 dəqiqə sonra küçənin qarşı tərəfində partladılıb.

Qurbanlar arasında həm hərbçilərin, həm də dinc sakinlərin yer aldığı bildirilir. Rəsmilər itki sayının artacağını istisna etmir.

Hücuma görə hələlik heç bir qruplaşma məsuliyyəti öz üzərinə götürməyib. Müstəntiqlər partlayışların 10-15 dəqiqə intervalla törədilməsi faktına əsasən, terrorçuların daha çox mülki əhali arasında böyük itkilərə səbəb olmaq istədiklərini hesab edir.

Qeyd edək ki, 2011-ci ildə Müəmmər Qəddafi rejiminin devrilməsindən sonra ölkədə faktiki olaraq xaos hökm sürür. İki rəqib parlament və çoxsaylı hərbi dəstələr arasında hakimiyyət uğrunda gedən siyasi-hərbi çəkişmələr İŞİD terrorçu qruplaşmasının ölkədə fəaliyyətini genişləndirməsinə yol açıb./oxu

İcmal.Az