2025-ci ilin 27 noyabr tarixində Naxçıvan Dövlət Universitetində akademik Yusif Məmmədəliyevin 120 illiyinə həsr olunmuş "Elmin zamanla sınanmış dəyəri” adlı Respublika Elmi Konfransı işinə başlayıb. Ölkənin müxtəlif ali təhsil müəssisələrinin alim və tədqiqatçılarını bir araya gətirən tədbirdə Mingəçevir Dövlət Universiteti (MDU) də təmsil olunub.
Konfransın açılışında çıxış edən təşkilat komitəsinin üzvləri akademik Yusif Məmmədəliyevin Azərbaycan elminə verdiyi töhfələrdən, xüsusilə kimya elminin inkişafındakı müstəsna rolundan bəhs edərək, yubiley tədbirinin onun zəngin elmi irsinə ehtiramın ifadəsi olduğunu bildiriblər.
Universitetin tədris prosesinin təşkili və idarə olunması məsələləri üzrə rektor müşaviri Ceyhun Mahmudovun rəhbərlik etdiyi nümayəndə heyəti konfransda Ümumilikdə MDU akademik Yusif Məmmədəliyevin 120 illik yubileyinə həsr olunmuş konfransda 7 məqalə ilə iştirak edib. Məruzələr onlayn və əyani formada təqdim olunub.
Əyani formada keçirilən panel sessiyalarında MDU-nun alimlərindən Elman Şirinov "Yeni klatratların sintezi və fiziki-kimyəvi analizi” və Adil Aslanov "Çətin həll olunan metal sulfidlərin həllolma kriterlərinin təhlili” mövzularında məruzələrlə çıxış edərək, kimya elminin müasir istiqamətləri və tətbiqi tədqiqatların inkişafı sahəsində öz elmi töhfələrini veriblər.
Universitetin nümayəndələri elmi müzakirələrdə aktiv iştirak edib, həmkarlarla fikir mübadiləsi apararaq MDU-nun elmi fəaliyyətində əldə olunan nəticələr barədə məlumat veriblər.
Qeyd edək ki, MDU akademik Yusif Məmmədəliyevin 120 illik yubileyi münasibətilə ekoloji və elmi sahələrdə müxtəlif tədbirlər təşkil etməyə davam edir və universitet nümayəndələri bu tədbirlərdə fəal iştirak edirlər.
