Bu gün azad Qarabağ və Şərqi Zəngəzur innovativ və dayanıqlı inkişaf məkanına çevrilib.
Bunu Azərbaycan Prezidentinin Zəngilan, Qubadlı və Cəbrayıl rayonlarında xüsusi nümayəndəsi Vahid Hacıyev "Zəfərin beş ili: Dövlətçilik və hüququn qələbəsi” mövzusunda konfransda deyib.
O bildirib ki, işğal dövründə yerlə-yeksan edilmiş şəhər və kəndlər bərpa olunur:
"Hava limanları, yollar, körpülər, tunellər, digər obyektlər inşa edilir, elektrik və su xətləri çəkilir. Bölgədə Azərbaycanın gələcək inkişafının yeni modellərindən biri formalaşır. Məcburi köçkünlər öz doğma ata-baba yurdlarına qayıdır. Artıq keçmiş məcburi köçkünlərimiz yenidən qurulan Zəngilan rayonunun Ağalı, Məmmədbəyli kəndlərində, Cəbrayıl şəhər 1-ci yaşayış kompleksində və Horovlu kəndində məskunlaşıblar".
Xüsusi nümayəndə qeyd edib ki, bu gün işğaldan azad edilmiş ərazilərdə belə bir tədbirin keçirilməsi bizim üçün əlamətdar hadisədir:
"Bu baxımdan da tədbirin təşkilinə görə Azərbaycan Respublikasının Baş Prokurorluğuna, Kamran Əliyevə xüsusi təşəkkürümü bildirmək istəyirəm".
