Millət vəkili Ramil Həsən üçün özəl gün - DOSYE

OXUNUB: 60 SOSİAL

7NEWS.az xəbər verir ki, bu gün millət vəkili Ramil Həsənin doğum günüdür. Ramil Həsən 23 sentyabr 1978-ci ildə Qərbi Azərbaycanın (indiki Ermənistan) Qafan şəhərində anadan olmuşdur. 

O, Bakı Dövlət Universitetinin Tarix fakültəsi üzrə bakalavr və Beynəlxalq Münasibətlər fakültəsi üzrə magistr dərəcəsini əldə etmişdir. 

Ramil Həsən 1999-2002-ci illər arasında Qaradağ bələdiyyəsinin (Bakı şəhəri) üzvü və sədr müavini işləmişdir. O, 1999-2003-cü illərdə Azərbaycan-Türkiyə Gənclər Dostluğu Cəmiyyətinin yaradıcısı və həmsədri olub. 

1999-2005-ci illərdə Yeni Azərbaycan Partiyası Siyasi Şurasının üzvü olmuşdur. 

2002-ci ildən 2010-cu ilin yanvar ayına qədər Ramil Həsən Azərbaycan Respublikası Diasporla İş üzrə Dövlət Komitəsinin şöbə müdiri vəzifəsində çalışmışdır. 

O, həmçinin 2005-ci ildən 2010-cu ilə qədər Yeni Azərbaycan Partiyası Gənclər Təşkilatının sədri vəzifəsində çalışmışdır. 

2008-2014-cü illər arasında Ramil Həsən Bakı Dövlət Universitetinin Beynəlxalq Münasibətlər fakültəsində "Müasir Azərbaycanın Xarici Siyasəti" mövzusunda mühazirə oxumuşdur. 

Ramil Həsən, Türkdilli Ölkələrin Parlament Assambleyasının (TÜRKPA) 29 sentyabr 2009-cu il tarixində Bakıda keçirilən ilk plenar iclasında TÜRKPA-nın ilk baş katibi seçilmişdir. 

15 yanvar 2010-cu il tarixindən 1 oktyabr 2013-cü ilədək Ramil Həsən TÜRKPA Beynəlxalq Katibliyinin Baş katibi - diplomatik nümayəndəliyin rəhbəri kimi fəaliyyətini davam etdirmişdir. 

2013-cü ilin noyabrından 2014-cü ilin yanvar ayına qədər Londonda peşə bacarıqlarının artırılması üzrə Ekstensiv Təhsil Proqramında iştirak etmişdir. 

2014-cü ilin mart ayında Ramil Həsən, Harvard Universiteti, Con F. Kennedi İdarəetmə Məktəbinin Senior Executive Fellows Program-ını bitirmişdir. 

O, 5 iyun 2014-cü il tarixində keçirilən Türkdilli Dövlətlərin Əməkdaşlıq Şurasının (Türk Şurası) Dördüncü Zirvə görüşündə Azərbaycan Respublikasının Prezidenti cənab İlham Əliyevin təqdimatı ilə Azərbaycan, Qazaxıstan, Qırğızıstan və Türkiyə prezidentlərinin qərarı ilə Türk Şurasının baş katibi təyin edilmişdir. 

2014-cü ildə Azərbaycan Respublikasının Prezidenti İlham Əliyev tərəfindən ona birinci dərəcəli Fövqəladə və Səlahiyyətli Elçi Ali diplomatik rütbəsi verilmişdir.   

2017-ci ildə çoxtərəfli əməkdaşlığın inkişafındakı xidmətlərinə görə nüfuzlu Crans Montana Forumu tərəfindən Xüsusi Şərəf Medalı ilə təltif edilmişdir.   

2017-2019-cu illərdə Ramil Həsən İsveçrənin Cenevrə şəhərində yerləşən aparıcı beynəlxalq təşkilat olan İdman Bütövlüyü Qlobal Alyansının (Sport Integrity Global Alliance - SIGA) vitse-prezidenti seçilmişdir. İki il vitse-prezident vəzifəsində çalışmışdır.    

9 fevral 2020-ci ildə keçirilmiş növbədənkənar parlament seçkiləri zamanı Ramil Həsən hakim Yeni Azərbaycan Partiyası tərəfindən namizəd kimi irəli sürülmüş və Azərbaycan Respublikası Parlamentinin Deputatı seçilmışdir. İndi Azərbaycan Respublikası Parlamentinin Beynəlxalq və Parlamentlərarası əlaqələr üzrə daimi komissiyasının üzvüdür. 

Ailəlidir, bir oğlu və bir qızı var. 

7NEWS.az

RƏYLƏR