Azərbaycan Respublikasının Gənclər Fondunun maliyyə dəstəyi ilə "SAF Həyat Naminə” Gənclər İctimai Birliyi tərəfindən "EKOMƏKTƏB - Gənclərin Ekoloji Maarifləndirmə Proqramı” adlı layihəyə start verildi.
Layihənin əsas məqsədi - cəmiyyətdə, xüsusilə də yetişməkdə olan yeni nəsil-məktəblilər və gənclər arasında, həyata keçiriləcək çoxsaylı ekoloji tədbirlər vasitəsilə geniş ekoloji maarifləndirmə işləri aparmaq və yetişməkdə olan yeni nəsildə ekoloji duyarlılığı formalaşdırmaqdır. Ətraf mühitin mühafizəsi sahəsində həyata keçirilən kompleks tədbirlər və əhali arasında ekoloji təbliğatın və maarifləndirmənin aparılması insanların sağlam təbii mühitdə yaşamasına və dünyamızın sağlam gələcəyinə xidmət edir.
Layihə çərçivəsində ilkin olaraq ekoloji sahəyə marağı olan gənclər arasında sorğular keçirildi. Sorğu nəticəsində iştirakçılar müəyyən edildi. Cari ilin 25, 27, 28 sentyabr tarixlərində Xəzər Media Mərkəzində seçilmiş gənclərə Xəzər Radio və Televiziya Şirkətlər Qrupunun peşəkar Operator, aparıcı – jurnalistlər və ssenaristlər tərəfindən təlimlər keçiriləcəkdir. Təlimin sonuncu günü iştirakçılara tapşırıq veriləcək və qruplara bölünəcəklər.
Verilən tapşırıq üzrə ekoloji sahədə video təqdimatlar hazırlanacaq və yekun tədbirdə təqdim olunacaqdır.
Layihənin müddəti 3 aydır. Yekun tədbir 10 Oktyabr 2024-cü il tarixində Xəzər Media Mərkəzində keçiriləcəkdir.
