Vəzifədə qocalan Qocayev - Samuxda şok tender maxinasiyaları

OXUNUB: 74 GÜNDƏM HADİSƏ
İşdən çıxarılan məktəb direktoru Bənövşə Cəfərovanın Vətən müharibəsinin tarixi haqda səhvləri onun həyat yoldaşı - Samux rayonunun icra başçısı Alı Qocayevin fəaliyyətini də diqqət mərkəzinə gətirib...
İlk dərs günündə çıxış edərkən 27 sentyabr - Anım Gününə Zəfər günü, 44 günlük Vətən müharibəsinə isə "24 günlük müharibə” deyən məktəb direktoru Bənövşə Cəfərovanın işdən çıxarılması barədə məlumat vermişdik.  Bənövşə Cəfərovanın səhvləri onun həyat yoldaşı - Samux rayonunun icra başçısı Alı Qocayevin fəaliyyətini də diqqət mərkəzinə çəkib. Bu olay olmasaydı, bəlkə də çoxları Alı Qocayevin icra başçısı olmasını xatırlamırdı... 

 

Bir vaxtlar adı qəzet səhifələrindən düşməyən qocaman icra başçısı Samuxda nə işlər görür? Bu kiçik və kasıb rayonun əhalisi Alı Qocayev haqda nə deyir? Xalq ondan razıdırmı? İcra başçıları arasında aparılan gəncləşdirmə siyasəti nədən Qocayevdən yan keçir?

İcra başçısının Vətən müharibəsi barədə kobud səhv edən direktor arvadı işdən çıxarıldı - VİDEO
 Bənövşə Cəfərova
Bir neçə gün əvvəl Samux rayonunun Çobanabdallı kənd sakini rayon icra hakimiyyətinin qazi və şəhid ailələrinə qarşı biganəliyi haqda mətbuata açıqlama verib. Şikayətçi Kəramət Həsənovun sözlərinə görə, II Qarabağ savaşında iştirakçı olub, Cəbrayılın azadlığı uğrunda gedən döyüşlərdə ağır yaralanıb, müalicə olunduqdan sonra da Laçın uğrunda döyüşlərə qatılaraq hərbi xidmətdə olub. Onun bildirdiyinə görə, ötən ilin dekabrından tərxis edilib evinə geri dönəndən nə yerli icra hakimiyyəti, nə də rayonun hansısa vəzifəli şəxsi onunla maraqlanır. O, hazırda işsizdir və dəfələrlə rayonun icra başçısı Alı Qocayevin qəbuluna düşmək cəhdləri nəticəsiz qalıb. Ona nə öz kəndində, nə də digər ünvanda hansısa iş tapılır. O, ailəsinin dolanışığının acınacaqlı olduğunu bildirərək ölkə rəhbərliyindən yardım istəyir. Şikayətçi "Cəbrayılın azadlığı uğrunda” və "Vətənə xidmətə görə” medalları ilə də təltif edilib.

Daha bir icra başçısının ferması üzə çıxdı - FOTO | KONKRET
Mətbuatda yer alan digər yazı isə Samuxda kotirovka sorğuları və tenderlərin keçirilməsi qaydaları ilə bağlıdır. Aktualinfo.org-un Samux Mənzil-Kommunal Təsərrüfatı İstehsalat Birliyi tərəfindən keçirilmiş kotirovka sorğusu prosedurları ətrafında apardığı araşdırmalar da bir çox qanun pozuntusuna yol verildiyini üzə çıxarıb. Belə ki, Samux Mənzil-Kommunal Təsərrüfatı İstehsalat Birliyi tərəfindən 2020-2021-ci illərdə bir neçə kotirovka sorğusu keçirilib ki, nəticələri, yəni hansı şirkətlərlə müqavilə bağlanması, alınan mallar və xidmətlər üçün nə qədər dövlət vəsaitinin ayrılması barədə məlumatlar ictimaiyyətdən gizlədilib. Sözügedən qurumun təkcə 2020-ci ildə elan etdiyi, lakin nəticələrini açıqlamadığı kotirovka sorğularını diqqətinizə çatdırırıq.

Tikili və avadanlıqların cari təmiri üzrə 16.06.2021-ci il tarixdə elan olunmuş kotirovka sorğusunun nəticələri:

Dəftərxana ləvazimatları və təsərrüfat mallarının satın alınması üzrə 08.06.2021-ci il tarixdə elan olunmuş kotirovka sorğusunun nəticələri;

Maşın və avadanlıqların satın alınması üzrə 05.05.2021-ci il tarixdə elan olunmuş kotirovka sorğusunun nəticələri;

Samux Rayon Mənzil Kommunal Təsərrüfatı İstehsalat Birliyində Bayraqların satın alınması üzrə 20.04.2021-ci il tarixdə elan olunmuş kotirovka sorğusunun nəticələri;

Samux Rayon Mənzil Kommunal Təsərrüfatı İstehsalat Birliyində ötürücü qurğuların alınması üzrə 15.04.2021-ci il tarixdə elan olunmuş kotirovka sorğusunun nəticələri;

Abadlıq işlərinin aparılması məqsədilə mal-materialların satın alınması üzrə 13.04.2021-ci il tarixdə elan olunmuş kotirovka sorğusunun nəticələri;

Samux Rayon Mənzil Kommunal Təsərrüfatı İstehsalat Birliyində nəqliyyat vasitələrinin cari təmiri üzrə 12.04.2021-ci il tarixdə elan olunmuş kotirovka sorğusunun nəticələri;

Samux Rayon Mənzil Kommunal Təsərrüfatı İstehsalat Birliyində abadlaşdırma və təmizlik işlərinin həyata keçirilməsi məqsədilə təsərrüfat mallarının satın alınması üzrə 08.04.2021-ci il tarixdə elan olunmuş kotirovka sorğusunun nəticələri;

Samux Rayon Mənzil Kommunal Təsərrüfatı İstehsalat Birliyində yaşıllaşdırma işlərinin həyata keçirilməsi məqsədilə mal-materialların, ağac tinglərin, bəzək kolları və gül çiçəklərin satın alınması üzrə 12.03.2021-ci il tarixdə elan olunmuş kotirovka sorğusunun nəticələri;

İşıqlandırma işlərinin görülməsi üçün mal-materialların satın alınması üzrə 17.02.2021-ci il tarixdə elan olunmuş kotirovka sorğusunun nəticələri;

Mənzillərin əsaslı və cari təmiri obyekti üzrə iş və xidmətlərin satın alınması üzrə 15.10.2020-ci il tarixdə elan olunmuş kotirovka sorğusunun nəticələri.

Yaşıllaşdırma işlərinin həyata keçirilməsi məqsədilə mal-materialların, ağac tinglərin, bəzək kolları və gül-çiçəklərin satın alınması üzrə 23.06.2020-ci il tarixdə elan olunmuş kotirovka sorğusun da 46250 manat məbləğində satınalma müqaviləsi 19.08.2020-ci il tarixdə "VİS” MMC ilə bağlanılıb.

Kommersiya qurumunun hüquqi şəxslərin dövlət reyestrinə daxil edilmiş məlumatlarında "VİS” Məhdud Məsuliyyətli Cəmiyyətinin 03.02.2020-ci il tarixdə İqtisadiyyat Nazirliyi yanında Dövlət Vergi Xidmətinin 12 saylı Ərazi Vergilər İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının Gəncə şəhəri, Ozan, ev 104, m. 9, qanuni təmsilçisi kimi isə Fərəcov Hafiz Nazim oğlu qeyd olunub.

Göründüyü kimi, MMC fevral ayında dövlət qeydiyyatına alındığı halda avqust ayında İstehsalat Birliyi satınalma müqaviləsi bağlayıb. MMC-nin ixtisas göstəriciləri və maddi texniki bazası barədə açıq mənbələrdə heç bir məlumat yoxdur.

Dövlət satınalmalarının rəsmi veb saytında dəyişik oldu - Şəffaflıq artırıldımı?..
Dövlət satınalmalarının rəsmi portalına yerləşdirilmiş məlumatlardan da göründüyü kimi, Samux Mənzil-Kommunal Təsərrüfatı İstehsalat Birliyinin Tender Komissiyası yuxarıda göstərilən tarixlərdə kotirovka sorğularının keçirilməsi barədə elan versə də, keçirilmiş kotirovka sorğularının nəticələri barədə məlumatları gizlədib, müqavilələrin bağlanması barədə heç bir məlumat verməyib, ayrılan vəsaitlər barədə məlumatları açıqlamayıb. Xüsusilə qeyd etmək istərdik ki, bir neçə tender elanından başqa Samux Mənzil-Kommunal Təsərrüfatı İstehsalat Birliyinin Tender Komissiyası tərəfindən keçirilmiş kotirovka sorğularının nəticələri barədə Dövlət Satınalmalarının rəsmi portalının bazasında heç bir məlumat yerləşdirilməyib. Bu da "Dövlət Satınalmaları Haqqında” Azərbaycan Respublikası Qanununun 10-cu maddəsinin tələblərinin ciddi şəkildə pozulması deməkdir.

Onu da xüsusilə vurğulamaq istərdik ki, Samux Mənzil-Kommunal Təsərrüfatı İstehsalat Birliyi Tender Komissiyasının elektron poçtuna ünvanladığımız sorğu məktubuna nəinki cavab verilməyib, hətta heç baxılmayıb da. Bunu bizə tender komissiyasının üzvlərindən biri bildirdi. İstehsalat Birliyinin rəisi Mahir Əliyev isə ümumiyyətlə, telefonunu açmadı. Bütün bunlara özbaşınalıqdan başqa nə ad vermək olar?

Etibarlı mənbələrdən əldə etdiyimiz məlumatlara görə, Samux Mənzil-Kommunal Təsərrüfatı İstehsalat Birliyinin rəisi Mahir Əliyev İcra başçısı Alı Qocayevin rayondakı ən yaxın adamlarından biri kimi tanınır. Məlumatlara görə, Alı Qocayev 2012-ci ildə Samux Rayon İcra Hakimiyyətinə başçı təyin edildikdən sonra vəzifə başına gətirdiyi Mahir Əliyevə geniş səlahiyyətlər verib. Mahir Əliyev də bu fürsətlərdən istifadə edərək abadlaşdırma və təmizlik işlərinə, nəqliyyat vasitələrinin cari təmirinə, mənzillərin əsaslı və cari təmiri işlərinə, işıqlandırma və yaşıllaşdırma işlərinin həyata keçirilməsinə ayrılan dövlət vəsaitlərini özünə yaxın şəxslərin adına yaradılmış şirkətlər vasitəsilə təyinatından kənarlaşdırmaqla məşğuldur. Təbii ki, bütün bunlar da bir icra başçısı kimi Alı Qocayevin nəzarəti altında həyata keçirilir.

Yada salaq ki, 2021-ci il sentyabrın 14-də Prezident İlham Əliyev Rafiq Cəlilovu Cəlilabad  və Rəşad Tağıyevin isə  Şəmkir Rayon İcra Hakimiyyətinin başçısı vəzifələrinə təyin olunmaları ilə əlaqədar videoformatda qəbul zamanı deyib ki, həbs edilmiş icra başçıları tender prosedurlarını kobudcasına pozublar. "Yəni dövlət xətti ilə aparılan layihələrin, dövlət alışlarının icrası ilə əlaqədar tenderlərdə adətən bir neçə icra başçısına, ya da ki, onun müavininə yaxın olan şirkətlər qalib gəlirdilər. Nə üçün? Çünki burada da rüşvətxorluq və mənimsəmə halları kütləvi xarakter alırdı və bu da dövlət büdcəsinə böyük ziyandır”, - deyə İlham Əliyev bildirib.

Qarşı tərəfin də mövqeyini dərc etməyə hazırıq.  /"Yeni Müsavat”

RƏYLƏR